ازاى تكسبى قلبة ؟ 2

 اتكلمنا المرة الاول فى ازاى تكسبى قلب حبيبك عن الغريزة و التقدير و الاستقلاليه و الثقة بالنفس و الاخلاص و الاخلاق و الرومانسية و الحنية و الفرفشة و هنكمل هنا باقى النقاط عن الحاجات اللى الراجل بيحبها فى الست .

لينك الموضوع الجزء الاول هنا 

10. الدلع :

اتدلعى انتى عليه بدل ما السكرتيرة هى اللى تدلع عليه            الرجالة بتعشق الست الدلوعة بس طبعا مش دلع مصطنع لا دلع طبيعي و للمرة المليون هو مش عايز يرتبط بواحد صاحبة حسسيه بأنوثتك و جمالك .

11. متدلقيش و متزنيش :

الراجل بطبيعته مش بيحب الحاجة السهلة و لما بتكون الحاجة سهلة بيمل منها بسرعة و يبعد عنها يعنى لو فضلتى كل شوية تتصلى و تزنى و تدلقى عليه هيمل و يبعد ولو اتصلتى مرة و عشرة لا و سيبتيه هو اللى يتصل و يدور عليكي هتلاقيه متمسك بيكي ، الراجل بيحب الست التقيلة .

12. الاحترام : 

الراجل بيحب الست تحترمه جدا قدام الناس ، حاولى على قد ما تقدرى متقليليش منه قدام حد حتى لو على سبيل الهزار و الضحك وزى ما ستات زمان قالوا (إديله برستيجه قدام الناس و فى البيت اسحبيه منه تانى )

13. أهتمى بإهتماماته :

شوفى هو بيحب إيه و اهتمى بيه حتى لو الحاجة مش عجباكى كفاية بس انك متكرهيهاش ، شوفى مثلا بيحب ياكل ايه مش شرط تاكلى منه لو مش بتحبيه بس اعمليه علشانه هو التاتشات الصغيرة دى بتفرق معاهم .

14. الاكل :

مش بقولك الراجل بدائى جدا و زى ما قالوا زمان الطريق لقلب الراجل معدته ، فطريه انتى قبل ما يروح الشغل بدل ما زميتله هى اللى تفطرة ، مش شرط تبقى الشيف الشربينى فى طبخك كفاية انك تعمليه بحب و اهتمام ده بيفرق كتير .

15 . المساحة الشخصية :

سبيله مساحته الشخصية اللى يقدر ياخد فيها نفسه مينفعش تفضلى تضيقيها عليه و تخنقيه مش هتبقى آخر الدنيا لو خرج مع صحابة على القهوة او راح لعب بلاي ستيشن سيبيه يشم هوا وانتى كمان على فكرة لازم يكون ليكي مساحتك الشخصية علشان تاخدى بريك و توحشوا بعض .

16. متبقيش سهلة : 

من الاخر فيه رجاله بتفضل ملايكه لغاية لما تاخد اللى عايزاه و بعدين هوب تلاقيهم فى النص التانى من الكرة الارضية ، متبقيش فريسة للنوع ده خلى بالك من نفسك الراجل ميطولش اى حاجة غير فى حدود شرع الله غير كدا لا احفظى نفسك حتى لو كنتى واثقة فيه و مهما قالك انتى مراتى و الحوارات دى متسمعيش منه لانه حتى لو كمل هيفضل يشك فيكي و هيقول دى خانت ثقة اهلها مش هتخونى انا و هتعيشي فى عذاب بقيت حياتك . 

17. الراس بالراس :

الراجل بيكره الست اللى بتتحداه و تفضل تدخله معاها فى مقارنات و أنهم زى بعض ، الراجل بيحب يحس برجولته وانه ديما هو القائد حتى لو انتى اللى ممشيه الدنيا و ماسكه زمام الامور مش هيجرى حاجة لو حسستيه ان هو السبب و لولا تشجيعه ليكي مكنش ده حصل ، لازم تحسسيه برجولته و أنوثتك لازم يحس بالختلاف . 

• خليكي انتى و جوزك صحاب علشان تستمتعوا بحياتكوا 
• الجواز مشاركه مش تحدى مين الأفضل 
• كل ما لغة الحوار زادت كل ما كانت العلاقة ناجحة اكتر 
• لازم يكون فيه مساحة شخصية لكل واحد 
• لازم يكون فيه مودة و رحمة