ازاى تكسبى قلبه ؟

ازاى تخلى جوزك او خطيبك بيحبك جدا او بمعنى اوضح ازاى تكسبي قلبة و عقلة و تخليه ميروحش لغيرك .

سيبك من منطق مع السلامة للى عايز يمشى ده لان الراجل لو اتساب هيتجاب خلينا نفكر بتفكير الستات زمان اللى كانوا بيعرفوا يظبطوا بيتهم و يحافظوا على حياتهم و نسعى سوا اننا نقلل نسب الطلاق .

و علشان نقدر نخلى الراجل يحبنا لازم نفكر بتفكيرة و نشوف هو بيحب ايه و بيكره ايه علشان كدا لازم نجاوب على السؤال ده .

ليه الراجل بيحب الست ؟ 

1. الغريزة :

الراجل كائن بدائي جدا وأكتر حاجة بتحركه هى غريزته بيتشد للشكل فى المقام الاول علشان كدا لازم انت كبنت او ست تهتمى بنفسك مش شرط لبس ضيق و ميك أب لكن يبقى شكلك منسق و نضيف مش ماشية مهملة فى نفسك .

2. التقدير : 

الراجل بيحب يحس بقيمته يعنى بيحب ديما يحس انه عمل إنجاز علشان كدا من طرق كسب الراجل انك تقديره تمدحى الحاجات الكويسة فيه و تحسسيه بإنجازه حتى لو عمل حاجة بسيطة ، يعنى مثلا لو شال حاجة تقبله مكانك او جاب حاجة وهو راجع البيت حسسيه انه عمل حاجة كويسة و يستاهل الشكر عليها مش عادى و ايه يعنى ما الرجاله كلها بتعمل كدا.

3. الاستقلالية : 

الراجل بيحب الست المستقلة اللى ليها دماغ و تفكير مختلف مش التابعة لحد ، يعنى من الاخر بيحب الست اللى ليها شخصية مش اللى ماشية بكلام الناس سواء أهلها او اصدقائها. 

4. الثقة بالنفس :

البنت الواثقة فى نفسها بيبقى ليها بريق خاص بيها و روح مختلفة عن أى بنت تانيه بس ده مش معناه التكبر و الغرور علشان كدا لو انت مش واثقة من نفسك حاولى تغيرى المفهوم ده من جواكى الاول و اشتغلى على نفسك لإن كل إنسان ليه مميزات و عيوب ، شوفى ايه مميزاتك وفى طوريها و حاولى تسيطرى على عيوبك و ده ليكي انت قبل ما يبقى لأى حد .

5. الإخلاص و الثقة : 

لازم الراجل يوصله إحساس بالثقة من ناحيتك ، يبقى عارف إن طول عدم وجوده معاكى مش محتاج يقلق علشان هو واثق فيكي و فى أخلاقك و إخلاصك ليه وده انت اللى بتوصليه ليه سواء بالكلام أو بالأفعال . 

6 . الاخلاق و الحكمه : 

اكيد الراجل بيدور على شريكة حياته و أم لأولاده تكون إنسانة يقدر يعتمد عليها علشان كدا بيدور على أخلاقها و تربيتها و سلوكها و ازاى بتتصرف فى المواقف مهما كانت الرجالة عينهم زايغة وقت الارتباط بيدور على مين اللى تنفع أم لأولاده . 

7. الرومانسية : 

الراجل بيحب البنت الرومانسية اللى بتعرف تقول كلام حلو و يكون صوتها هادى و رقيق مش اللى كل كلامها دبش و زعيق و خناق وصوتها أعلى من صوته ، هو مش عايز يرتبط بواحد صاحبة لازم تحسسيه انك انت نصه الحلو . 

8. الحنية و الاحتواء : 

الراجل بيتشد للحنية و الاحتواء و بيبعد و ينفر من الست القاسية علشان كدا نصيحة منى إسمعيه ، اسمعى مشاكله و احتويه لو تعبان لازم يحس ان قلبك عليه و خايفة عليه مش إيه يعنى مهو هياخد الدوا و يبقى تمام ، وده مقصدش التمثيل طبعا بس فيه ستات بتخاف تظهر مشاعرها دى علشان تبقى قوية لكن الرجاله بتترجم ده قسوة و عدم حب . 

9. الفرفشة :

زى ما قالوا الست الفرفوشة رزق ، الرجالة عندهم عقدة من حاجة إسمها نكد بيموتوا منها كدا و بعدين ليه تنكدى أصلا الدنيا مش مستاهلة والله ، فرفشي كدا و اضحكى محدش واخد منها حاجة اسعدى نفسك و اسعديه و افتكرى كل لما النكد قل كل ما فرصة نجاح العلاقة زادت . 

ولحد هنا كدا خلصنا و هنكمل الباقى فى الموضوع الجاى علشان لسه حاجات كتير مقولنهاش