امتى ابنى ياكل ؟

 كل الامهات عندهم نفس السؤال امتى اخلى ابنى او بنتى ياكلوا و ايه هو الاكل المناسب ليهم و ازاى اعرف الاكل ده ينفع ياكلوا منه تانى ولا لا ؟ ده غير كلام تيته و طنط ما كل العيال كانت بتاكل وهما اصغر من كدا او اكلى الواد علشان لبنك مش بيشبعه و كلام كتير جدا هنجاوب على كل الاسئلة دى بالتفصيل الممل . 

اول حاجة لازم نعرفها ان من اول يوم ولاده لغاية الشهر الرابع هنعتمد على الرضاعة فقط لا غير 

بعد الشهر الرابع بنشوف ينفع نبتدى ندخل اكل للطفل ولا لا وده عن طريقة شروط معينه لازم تتوافر فى الطفل علشان نعرف انه جاهز لتناول الطعام .
شروط بدء اكل الطفل 
1- يعرف يقعد : لازم الطفل يكون بيعرف يقعد بدون ما جسمه يميل فى اى اتجاه حتى لو مسنود 
2- يثبت راسه : يكون بيقدر يتحكم فى حركة دماغة علشان لقدر الله ميتحركش غلط و الاكل ينزل فى مجرى التنفس و يحصله اختناق
3- يفتح بوقة : قدرة الطفل على فتح بوقه علشان يستقبل المعلقة لان مينفعش نفتح بوقة بالعافية 
4- عايز ياكل : لازم الطفل نفسه يكون ملهوف على الاكل و عنده رغبة فى الاكل يعنى مثلا لما بيشوف حد بياكل بيبقى عايز ياخد الاكل منه و يحطه عند بوقة 
5- وزن الطفل : لازم وزنه يكون مظبوط و ده بنعرفه من خلال الدكتور و نسأله هل هو مستعد للأكل ولا لسه 

نصائح لطعام الطفل 
1-الصنف اللى هنجرب نأكله للطفل لازم نجرب منه كميه صغيرة و نلاحظ فى وجود حساسية ولا لا لو ظهر اى اعراض للحساسية بنوقف الصنف ده و نروح للدكتور 
2- كل صنف بنجربه لمدة 3 ايام 
3-  لما بندخل الاكل للطفل بندخل معاه المايه بردو لازم الطفل يشرب لانه بدء ياكل 
4- كميه الاكل بتختلف من طفل للتانى حسب وزنه و حالته الصحيه و شهيته فبلاش مقارنه بين الاطفال 
5- فيه اطفال بيبقى عندهم حساسية القمح او انيميا الفول لازم تاخدى بالك كويس و تراقبى طفل لما تدخليهم ليه 
6- علشان تتجنبى حدوث امساك لطفلك بسبب الاكل لازم يشرب مايه و ياكل الخضار و ألياف 
7- منتجات الالبان بعد الشهر السادس و اللبن نفسه بعد عمر سنه 
8- لو رفض الاكل فى الاول حاولى معاه لغايه لما يقبله ( الطفل حسب التعود ) 
9- شهية الطفل مش ثابته بتتغير حسب الجو و التعب و التسنين 
10- قوام الطعام لازم يكون مهروس جيدا علشان ميتعبش الطفل 
11- ياريت الاكل يبقى معمول بشكل يومى يعنى مش بايت علشان تبقى قيمته عاليه 

ممنوعات قبل سنة 
1- الملح و السكر 

2-عسل النحل و بياض البيض 
3-اللحوم الحمرا 
4- العصائر المعلبه 
5- الحلويات والمواد الحافظة 
6- ممنوع اعطاء الطفل المكسرات بصورتها الطبيعيه لازم تكون مطحونة جامد 
7- ممنوع شرب الاعشاب غير بعد دخول الاكل للطفل 
8- ممنوع الجبنه المثلثات لانها بزيوت مهدرجة 

ملحوظة مهمة 
كملى رضاعة لطفلك اطول فترة ممكنه