طرق للحفاظ على الصلاة

 أول حاجة جاوب على السؤال ده 

ماذا فعل الله لك لكى تتجنب التواصل معه ؟

انت لو مديرك فى الشغل بينادى عليك هتقوم جرى و تسيب كل حاجة و تروح لغاية عنده تكلمه و تشوف طلباته مابالك برب العباد و لله المثل الأعلى عز و جل ، بينادى عليك مش علشان هو محتاجك لا علشان انت اللى محتاجه علشان تروح تقف بين ايديه تطلب كل شئ تتمناه و تحكيله كل همومك و مشاكلك يبقى ليه تتأخر عليه .

تانى حاجة انت عارف ان الصلاة بتجمع كل أركان الإسلام ؟

1. الشهاده : ودى بنقولها فى كل صلاة فى التحيات ( أشهد أن لا إله إلا الله و أشهد أن محمد رسول الله ) .
2. الذكاة : بنذكى عن طريق الوقت ، الوقت أغلى قيمه من المال فانت بتتصدق و بتاخد جزء من وقتك علشان تقوم تصلى . 
3. الصيام : هنا مش بنتكلم عن الصيام العادى عن الأكل والشرب بس لا احنا هنا بنتكلم عن صيام أعلى وهو الصيام عن كل شئ الأكل والشرب و الكلام و الشغل الصيام عن كل شئ للقاء الرحمن . 
4. الحج : احنا اصلا بنصلى فى اتجاه القبله (الكعبه )

خطوات معنوية للحفاظ على الصلاة 

التوبة و النية للحفاظ على الصلاة :

تقول يا رب العالمين انت توبت ليك و عايز انتظم فى الصلاة و مش هسيب فرض تانى أبدا إن شاء الله .

الاستعانة بالله : 

مفيش حاجة فى الدنيا ينفع نعملها بدون ما نستعين بالله علشان يوفقنا فيها و كذلك بردو الصلاة لازم ندعى ربنا علشان يعينا على نفسنا و نلتزم فى الصلاة و عن رسولنا الكريم عليه افضل الصلاة والسلام كان دائم الدعاء ( اللهم عنى على ذكرك وشكرك وحسن عبادتك ) .

الاستعانة بالاصدقاء : 

الصديق ديما ليه تأثير شديد على أصدقائه علشان كدا لازم يكون حواليك الصديق الصالح و الصحبة الطيبة اللى تساعدك على الحفاظ على الصلاة و تاخد بايدك لطريق الصلاح .

الإجتهاد : 

قول ديما لنفسك انك مهما وقعت لازم تقوم تانى و تقف على رجليك و لو صلاة فاتتك متقولش خلاص أنا مش نافع و مش هعرف انتظم لا قوم صليها وقت ما تفتكر و قول لنفسك ان شاء الله مش هسيب ولا فرض تانى .

الصلاة علاج الروح و تهذيب للنفس : 

خليك ديما عارف إن الصلاة تنهى عن الفحشاء والمنكر يعنى مهما كانت ذنوبك و المعاصى اللى بتعملها لو ألتزمت فى الصلاة هتلاقى نفسك بتبعد عن كل الحاجات دى . 

خطوات فعليه للحفاظ على الصلاة 

1. اسمع الأذان : تدبر معانى الأذان و أستشعر جملة الله أكبر وأعرف و أفهم إن الله أكبر وأهم من كل شئ بتعمله و مشغول بيه عن الصلاة و إن الله أكبر من كل همومك و المشاكل اللى انت شايف انها كبيرة و ملهاش حل و إن الله أكبر من كل الذنوب و المعاصى اللى انت بتعملها فمهما كان كبر حجم ذنبك ربنا أكبر منه و قادر يغفرلك و يسامحك . 
2. قوم أتوضى : لازم أول لما تسمع الأذان تسيب كل حاجة بتعملها و تقوم تتوضى علشان تصلى .
3. الملابس : خلى ملابس الصلاة و سجادة الصلاة فى مكان محدد و جاهزين دايما و ياريت كمان تبقى محدد مكان للصااة يكون فى ركن هادى بترتاح فيه و يكون نضيف و التهوية فيه كويسة . 
4. جدول الصلاة : ممكن تعمل جدول للصلاة يبقى قدام عينيك علشان يحفزك و يساعدك على الإلتزام فى الصلاة . 
5. تطبيقات الموبيل : نزل تطبيقات مواقيت الصلاة و سماع الأذان علشان او انت فى مكان صوت الأذان مش واصلك فيه تقدر تسمعه من الموبيل . 

• خليك ديما عارف إن الصلاة هى عماد الدين إذا سقطت سقط الدين كله . 
• خلى ديما بينك و بين ربنا باب مفتوح تعرف ترجعله منه علشان الباب ده لو اتقفل هتبقى خسرت الدنيا و الآخرة . 
• اللهم أعينا على ذكرك وشكرك وحسن عبادتك .