اساسيات تربية الأبناء

 تربية الأبناء حاجة صعبة جدا خصوصا فى الزمن ده و وسط التحديات اللى بيصنعها التطور التكنولوجى يمكن ده بيكون أصعب إمتحان للإنسان ، إنه ازاى يقدر يطلع إنسان سوى نفسيا يقدر يفيد أهله و مجتمعه و بلده ، ازاى يقدر يطلع إنسان متدين عارف نفسه و عقيدته و قيمه .

لازم كل أتنين مقبلين على خطوة الإنجاب يكونوا الأول واثقين انهم قد الخطوة دى علشان ميطلعوش جيل مشوه بيضر نفسه و غيره .

اساسيات تربية الأبناء 

1ّ. الاطلاع و القراءة :

لازم كل زوج و زوجة مقبلين على الإنجاب يبحثوا و يطلعوا على كيفية تربية الابناء تربية و يتعلموا طرق و أساليب التربية الصحيحة علشان يطلعوا طفل سوى نفسيا . 

2. القدوة :

خليك عارف ان انت القدوة ليهم زى ما بتعمل هيعموا هما مراية أفعالك ، مينفعش تقوله قوم صلى وهو شايفك مش بتصلى مينفعش تقوليله التجسس حرام وهو شايفك بتتصنتى على الجيران ، انت المثال الأول ليهم .

3. الغضب : 

إياك و إستخدام الطفل كوسيلة لخروج مشاعر الغضب اللى جواك هو مش مسئول عن المشاكل اللى بتمر بيها او عن ضغوطات الشغل و مديرك المستفز ، هو مجرد طفل صغير لا حول له ولا قوة راعى ربنا فيه و أفصل بينه و بين غضبك و مشاكلك .

4. انت اللى بتربى :

متعتمدش فى تربية طفلك على حد المدرسة و الدادة و الأقارب كل دول ممكن يضيفوا للطفل طبعا بس انت فين من كل دول انت اللى تربى انت اللى هتتسأل عليه من ربنا انت اللى هتحصد اللى هيتزرع فيه مينفعش حد تانى هو إللى يربى ابنك او بنتك انت العامل الأساسى .

5. الإهمال :

إياك تهمل ابنك او بنتك ده هو رصيدك فى الدنيا و الاخرة خصصلة وقت ليه تسيب كل حاجة و تركز معاه ، متخليش طفلك يدور على الإهتمام من حد تانى لانه هيكبر فى يوم و يبقى نفسك يهتم هوا بيك .

6. النقد الساخر :

بلاش نقعد نقول لاولادنا مثلا انت وقعت الحاجة جه انت غبي ، انت مش عارف تعمل الواجب علشان عبيط ، انت مش بتبطل اكل ده انت عجل ، كل الحاجات دى و اكتر بتتقال بصيغة الهزار على اساس ان الطفل مش فاهم لكن بالعكس هو بيبقى فاهم و مستوعب كويس جدا و الكلام ده بيأثر فيه و فى ثقته فى نفسه .

7. الضرب :

ممنوع الضرب نهائى بلاش نظام العقاب بالضرب ، الدين الإسلامي حط حدود و قواعد للضرب و منهم ان ممنوع الضرب نهائى قبل سن 7 سنوات و ان ممنوع الضرب على الوجه ، كل ده مش من فراغ لا لإن الضرب قبل ما يكون وجع جسدى هو ليه تأثير نفسي على الطفل و بيحسسه بالإهانة و بيخلق منه إنسان جبان و بيستجيب للعنف الجسدى .

8. المقارنة :

بلاش مقارنة بين الاطفال و بعضهم متخلقش من طفلك شخص بيبص ديما على غيره متخليهوش إنسان أنانى و ديما حاسس بالنقص علمه إن الناس كلها مختلفة عن بعض و ان كل واحد ليه مميزاته و عيوبة وإن ربنا خلقنا مختلفين علشان نكمل بعض .

9. الحب و الحنان :

خلوا أطفالكم شبعانين حب و حنان منكم الاطفال اللى بيلاقوا ده من أهلهم بيتبنى عندهم عاطفة و ثقة بالنفس قوية جدا غير ان ده بيعزز الثقة اللى بينكم و بيخلق ترابط شديد بينكم.

10. صاحب أبنك ، صاحبى بنتك :

حل كل مشاكل الأبناء من صغرهم لغاية لما يكبروا إننا نصاحبهم ، لو صاحبناهم مش هياخدوا النصيحة بزعل لا هيبقوا عارفين انها لمصلحتهم مش تحكم و خلاص ، لو عملوا حاجة غلط مش هيخافوا يقولوا لانهم واثقين فيكوا وفى رد فعلكم عليهم ، اسمعوهم من وهما صغيرين حتى لو كان كلام تافهة و حاجات بسيطة .

انتوا مش مجبرين تخلفوا لكن لو خلفتوا انتوا مجبرين تربوا