تنمية ذكاء و مهارات الطفل

كل أم بتبقى عايزة تنمي مهارات ابنها و تزيد من ذكائه علشان كدا لازم نهتم بكل تفاصيل حياة الطفل لان اللى بيتحكم فى ذكاء الطفل عاملين اساسين 

• أول حاجة عامل الجينات الوراثية وده مش هنقدر نتحكم أو نتدخل فيه 
• تانى حاجة عامل البيئة المحيطة بالطفل واللى هى كل حاجة بيتعرض ليها الطفل و طريقة التغذية الخاصة بيه علشان كدا هنتكلم فى كل حاجة تقدر تساعدنا علشان ننمى ذكاء و مهارات أطفالنا . 

التغذية و ذكاء الطفل 

التغذية بتلعب دور أساسي فى نمو الطفل و زيادة ذكاء الأطفال وده بيبان بين الاطفال و بعضهم يعنى هنلاخظ ان الاطفال اللى بيتغذوا بطريقة صحيحة و بيتبعوا نظام غذائى صحى ذكائهم و قدراتهم الإبداعية اكتر من الاطفال اللى نظامهم الغذائى غير صحى و بيعتمدوا على الوجبات السريعة و المواد الحافظة .

1. فترة الحمل :

من أول الحمل ولازم الأم تاكل طعام صحى و تتبع نظام غذائي جيد علشان تمد جسمها و الطفل بالعناصر الغذائية و الفيتامينات والمعادن اللى بتساعد على نمو الطفل و تاخد الفيتامينات الموصى بها من الطبيب زى الفوليك اسيد اللى بيساعد على تقوية الاعصاب للطفل لتنميه المخ و زيادة الذكاء.

2. لبن السرسوب :

لازم بعد الولاده مباشرة و لمده 3 ايام يرضع الطفل لبن السرسوب لإنه غنى بالأحماض الدهنية المهمة فى تنمية الجهاز العصبى للمخ و غنى بالمعادن و الأجسام المضادة و الخلايا المناعية اللى بتزيد من مناعة الطفل و تقوى المخ . 

3. الرضاعة الطبيعية :

لازم الام ترضع طبيعي و بلاش اللبن الصناعى او الاعشاب لعمر 4 شهور على الاقل لإنه بيحتوى على عناصر غذائية بتقوى المناعة و تزيد من نمو المخ وهو لبن الام الطبيعي هو أفضل غذاء للطفل . 

4. الأكل :

لازم تحتوى وجبات الطفل على كل العناصر الغذائية (البروتينات - النشويات - منتجات الحليب - فواكه - خضراوات)

أكلات مميزة لتنمية المخ و زيادة ذكاء الطفل 

1. الاسماك : بتحتوى الاسماك على كمية كبيرة من البروتينات و الأحماض الدهنية و أوميجا 3 اللى بيحتاجها الطفل علشان تزيد من ذكاء الطفل و بتكون بشكل اكبر فى الاسماك الدهنية .

2. المكسرات : المكسرات بكل انواعها بتساعد فى عملية النمو العقلى و زيادة الذكاء بالأخص اللوز و عين الجمل بس لازم فى المرحلة الاولى الطفل ياكله بشكل مطحون علشان ميحصلش حالة اختناق او شرقة للطفل فى حالة المكسرات السليمة فممكن نتحط المكسرات و نحطها على الزبادى او نخلطها مع الاكل . 

3. الخضراوات : كل انواع الخضراوات و أهمها الخضراوات الورقية زى السبانخ و القرنبيط لانهم خضروات غنية بالحديد اللى بيحمل الأكسجين وده بيساعد على وصول الأكسجين بشكل أفضل للمخ فيقوم بوظائفة بشكل سليم و ينمى ذكاء الطفل و ومهاراته . 

4. اللحوم الحمرا و البيض : يعنى البروتينات عالية القيمة و الحديد والفيتامينات و المعادن و مصدر مهم للكالسيوم اللى بيساعد على نمو الطفل بشكل صحى و سليم . 

5. الحبوب الكاملة : زى حبوب القمح و حبوب الشوفان و دول مصدر غنى جدا للطاقة و ابسط استخدام ليهم فى صورتهم الكامله هى البليلة باللبن و حبوب القمح . 

• تغذية الطفل تغذية سيئة بيأثر بشكل غير مباشر على نمو الطفل و زيادة ذكاء الطفل و قدراته . 

تنميه مهارات الطفل و زيادة الذكاء 

1. قراءة القصص المصورة :

من عمر 6 شهور و الأم المفروض تقرأ لطفلها قصص مصورة علشان تزيد من محصلة الطفل لإنه بيبقى فى مرحلة التخزين بيخزن كل حاجة بيسمعها و يشوفها فى المرحلة دى علشان يقدر يستخدمهم فى مرحلة متقدمة .

2. التحدث مع الطفل :

لازم الأم تفضل تتكلم مع الطفل بطريقة صحيح زى ما يكون شخص كبير حتى لو هى شايفة انه لسه مش مدرج ومش فاهم اللى هى بتقوله بالعكس الكلام مع الطفل بطريقة صحيحة بيعزز من حصيلته اللغوية و بيكون و يتعلم مفرادات الكلام و بتخليه يتكلم اسرع . 

3. استخدام الارقام :

لازم الأم تحاول تستخدم الأرقام فى الكلام علشان الطفل يتعود على استخدام الأرقام بشكل صحيح يعنى مثل تقول 3 منجات او معاها موزتين او تقسم التفاحة لنصين علشان يربط الرقم بالكم اللى قدامه .

4. تحدى الذاكرة :

وده بيحفز نشاط المخ يعنى وهى بتحكى قصة كانت قيلاها قبل كدا تقف فى جزء فيها و تقوله وبعدين ايه اللى هيحصل علشان تتحدى ذاكرة الطفل و تحفز خلايا المخ على النشاط.

5. فضول الطفل :

متفقيش قدام فضول طفلك طول مهو بيحاول يستكشف و يسأل عن الاسباب فدى علامه انه طفل ذكى و عايز يتعلم و يفهم فلازم الأم متزهقش و تحاول توفر البيئة الآمنة للاستكشاف علشان تساعد الطفل على التطور و زيادة الذكاء. 

6. الرعاية :

الحب و الحنان و زرع الثقة بالنفس فى الطفل عوامل اساسية لزيادة ذكاء الطفل لان الطفل الواثق فى نفسه مش بيبقى خايف انه يكتشف و يتعلم بالعكس ده بيزود من حبه للتعلم لانه كل لما بيتعلم حاجة جديدة ثقته بنفسه بتزيد و بيلاقى الحب و الحنان ظاهر من أهله فى هيئة مدح و تشجيع .

7. لعبة التخمين : 

دى بتساعد الطفل انه يطور بقيت حواسه و مخيلته من خلال اننا بنغمى عينه و نخليه يمسك حاجة و يحاول يكتشف ايه هى . 

8. النوم :

النوم لساعات كافية بيساعد الطفل على زيادة النمو والاسترخاء علشان يقدر يشحن نفسه بالطاقة الكافية لتنمية مهاراته فالابحاث العلمية وجدت ان الاطفال اللى بيناموا فى وقت مبكر و عدد ساعات كافية قدراتهم الذهنية و ذكائهم أعلى من الاطفال اللى بيناموا فى وقت متأخر او وقت قليل .

9. ممارسة الرياضة :

طبعا الرياضة ليها فوايد كتير ومن اهمها انها بتخرج طاقة الطفل و بتنشط الدورة الدموية فى الجسم  ده بيساعد الطفل على تنمية المخ و زيادة الذكاء.

10. الألعاب :

فيه ألعاب مخصصه لزيادة مهارات الأطفال و لكل عمر معين نوع ألعاب يتناسب مع عمر الطفل و تطور ذكائه .