أكلات بدون لحوم

علشان احنا بنحب نغير فى الاكل او بمعنى أصح نوفر شوية جبتلكم 15 أكله مش هنحتاج فيهم فراخ أو لحمه أو سمكه كنوع من انواع التغيير و التوفير فى نفس الوقت .

• الكشرى  :

وده هنحتاج فيه مكرونة صغيرة و اسبجتى و رز و شعرية و عدس بجبه و حمص و دقة وشطه ودى واجبه كمله متكامله مش هنحتاج جنبها اى حاجة وممكن نحمر جنبها شوية عيش كمان علشان لما نتلسع من الشطه ناكل من العيش .

• البصارة : 

مقادرها سهلة و بسيطه هنجيب فول مدشوش و بصل و توم و طماطم و شبت و كزبرة و ملح وفلفل ورشه نعناع ناشيف مع عيش مفقع بقى و مخلل وكدا عظمة أوى .

• شوربة العدس :

عدس اصفر و شعرية و جزر و بصل و طماطم و توم و بطاطس و ممكن نجيب عيش محمص كمان نعمله فتة عدس و معاها بصل فى مايه و خل او بصل اخضر و كدا يوم خلص. 

• مكرونة بالخضار :

ودى بقى مش بتاخد وقت ولا مجهود مكرونة و طماطم و فلفل و بصل و معلقة صلصة و مكعب مرقة و شوية مايه و ياريت اللى يجربها يدعيلى .

• كشرى عدس اصفر :

و هنا رز و عدس اصفر بس الفكرة فى التحابيش شوية بطاطس مع بيض مدحرج و فلفل و بتنجان و طماطم مخللة و شوية سلطة .

• بيتزا مشكل جبن :

ودى هقولك المقادير بالتفصيل 

صلصلة البيتزا ( طماطم و بصل و توم و مايه و توابل )

العجينة ( دقيق و سكر و  ملح و خميرة فورية و لبن بودر و زيت و مايه دافية )

الحشو ( طماطم و فلفل و زيتون و جبن مشكلة ) 

• مكرونة محمرة :

و هما هنجيب مكرونة صغيرة و نحمرها فى شوية زيت و نسويها زى الشعرية و نحط معاها مكعب مرقة و بردو جنبها بطاطس و بيض و ممكن نعمل معاها كفته بطاطس كمان .

• رز ببطاطس مدفونة : 

كل اللى هنحتاجة رز و بطاطس و طماطم مضروبة فى الخلاط و كله هيبقى فى حلة واحده يعنى مفيش مواعين ز جنبها شوية مخلل حلوين وألف هنا و شفا .

• مسقعة :

طبعا كلنا متعودين على المسقعة باللحمة المفرومة لكن المرة دى هنشيل اللحمه المفرومة و نحط مكانها مكعبات بطاطس مقلية و بنفس طريقة المسقعة العادية .

• محشى :

احلى محشي ممكن تاكليه هو المشكل اللى فى حلة واحده ده محشي كرنب على ورق عنب و معاهم فلفل و بتنجان و كوسة وكلهم سوا فى حلة واحدة ولو معندكيش شوربة دوبى مكعب مرقة فى مايه و اغليهم كأنهم شوربة و ملح و فلفل و هتاكلى احلى محشى مشكل .

• قرنبيط :

وده ممكن تقلية عادى و تاكليه بعيش او تعمليه صينيه بالخضرة و البيض و هتلاقى ريحته جايبة لاخر الشارع و بردو بعيش و مخلل و شوية جرجير معاهم .

• رز معمر :

وده بقى مش هنتكلم عليه كتير علشان هو بيتكلم عن نفسه صينية رز معمر و بطاطس و بيض مدحرج و مخلل . 

• مكرونة بالجبن :

وده كل اللى هتحتاجيه مكرونة و جبن مشكله و لبن وممكن كريمة طبخ . 

• رز بشعرية  : 

رز بشعرية و جنبها بطاطس محمرة  و بيض و شوية سلطة خضار او ممكن نعمل صينية بطاطس منغير فراخ ولا لحمه هتطلع حلوة بردو .

• طاجن فول بالبيض :

والبطل فيها هو الطاجن كل اللى عايزينه فول و طماطم و فلفل و بصل و بيض و جنبها بقى عيش و جبنة و بطيخ و احلى اكله نختم بيها الكلام .