تجهيزات شنطة الولادة

 فى اول الكلام ربنا يقوم كل ام بالسلامة هى و مولودها و ربنا يرزق كل مشتاق و يقر عين كل اتنين نفسهم فى بيبي يفرحهم 
لازم واحنا بنبتدى التجهيزات ليوم الولاده ناخد بالنا كويس من درجة حرارة الجو علشان متجيبيش هدوم تقيلة والجو حر او تجيبى هدوم خفيفة و الجو برد او هوا علشان البيبي ميتعبش

1. هدوم البيبي 

هنتكلم عن الولادة فى فصل الصيف و انتى تبتدى تتقلى الملابس على حسب الجو يعنى لو فى الصيف هتاخدى كوفيرتا فى الشتا هتاخدى كوفيرتا و بطانيه  

• لازم الهدوم تتغسل بالمايه قبل ما البيبي يلبسها لانه بيبقى حساس جدا و ممكن الهدوم دى يبقى عليها تراب او اى حاجة بسبب المحلات
• لازم ناخد بالنا من خامة الهدوم و تبقى ناعمه و قطنية على بشرة الطفل و ميدخلهاش بولستر
• ناخد بالنا ميبقاش فيها اكسسوارات او حاجات صغيرة ممكن تتقطع و البيبي يبلعها 
• ميبقاش فيها برونز (جليتر) علشان ممكن تعمل حساسية للبيبي 

   ايه الهدوم اللى هتتجاب ؟

1. فنلة قطن كت 
2. السلوبت او الطقم الخارجى 
3. طقية للراس 
4. شراب 
5. جوانتى علشان ميخربش نفسه 
6. كوفيرتا خفيفة            
7. فوطة خاصة بالبيبي 

          ملحوظة مهمه كل حاجة جبناها فى الهدوم هنجيب منها 2 علشان محدش ضامن الظروف     

2.مشتريات العناية الشخصية بالبيبي 

1. البامبرز (وده لازم حديث الولاده علشان بيبقى فيه جزء مخصص للسرة) 
2. مفرش او مشمع تغيير البامبرز 
3. مناديل ودى هنحتاجها اكيد 
4. مناديل مبلله و لازم تكون خاليه من الكحول و البرافين علشان متضرش البيبي 
5. كريم ترطيب مكان البامبرز 
6. كحول طبى 

نصايح مهمه 

1. تعالى على نفسك و حاولى ترضعي طبيعي افضل ليكي و للبيبي 
2. بلاش حد يقعد يشيل البيبي و يهزه علشان هيتعود و يتعبك بعدها
3. الرضاعة الطبيعي اهم من اى حاجة
4. بلاش بوس الطفل علشان بيبقى لسه معندوش مناعه
5. الرضاعة الطبيعي متنسيهاش 
6. بلاش حد يقولك خليه ياخد رضعة اعشاب او مايه بسكر الكلام ده هبد 
7. الرضاعة الطبيعي احسن من اى حاجة 
8. خلي دكتور الاطفال يفحص البيبي كويس علشان بعد الشر لو فيه حاجة تعرفوها من اول يوم و تعالجوها بدرى 
9. الرضاعة الطبيعي  كمان مرة 
10. حاولى تخلي المكان تهويته كويسه و مش زحمه علشان البيبى ميتعبش 
11. اخر حاجة الرضاعة الطبيعي الله يباركلك